|
Sunntig, dr 13.02.05
Hüt isch es also ab nach Schaffhuse gange. Dr Abholdienscht isch, wie mir uns das vom Andreas Normalerwis gwöhnt sind, e bitzeli z’spot cho.
So han ich scho zu so früeher Morgenstund (ca. 6.20) 2 ufgregti Telefonanrüef becho, wo mir denn eigentlich bliebe sige.
Nachdäm mir denn doch no alli ufglade händ, sin mir ändlich Richtig Schaffhuse gfahre.
Trotz verspöteter Abfahrt, sind mir rund e halb Stund z’früeh in Schaffhuse acho.
Do s’ Hallebad erst am 9.00 ufgmacht het, het dr Bojan sogar no gnueg Zit ka, zum uns sini erschte Fahrversüech z demonstriere.
S Trainingsbad isch eigentlich es Ussebad gsi, jedoch händ sie es Zält übers Becki chönne spanne, wo denn inne gheizt worde isch.
So isch s Ussebecki zumene Hallebad umgstaltet worde.
Im erschte Training hets e chli e längers Ischwümme gä, damit mir uns ans 50m Becki gwöhnt händ. Denn isches scho mit ere Stehvermögeserie losgange.
Jedoch händ gwüssi Lüt (ich nenn jetzt do keini Näme) nachdäm scho schlapp gmacht und händ die andere Serie nümm ighalte.
Nachem erschte überstandene Training sin mir öpis go z’Mittag ässe und denn ändlich ins Hotel.
Leider hämmer aber nit lang Pause ka, will mir am 15.00 wieder ins Training händ müesse.
Somit hämmer au unseri schöne Zimmer nonig chönne usnütze, aber dodrfür hämmer jo au no dr Obe ka.
Nachem zweite Training isch dä erschti Tag au scho gli verbi gsi. D Herre (ich weiss jo nit, ob dä Usdruck würklich für alli männliche Gschlächter,
wo mitcho sind, au würklich richtig isch...) händ dr Obe mit Playstation spiele verbrocht und mir andere händs uns vorem Färnseh gmüetlich gmacht.
Denn isch au scho bald Nachtrueh gsi, denn mir händ jo füre nögschte Tag wieder müesse fit si.
Mäntig, dr 14.02.05
Valentinstag!!! Do het doch dr Botta alias Wolfi Geburtstag. Leider hämmer nit viel Zit zum fiire ka, denn hüt simmer scho am 8i ins Wasser gange.
Es isch aber no e grosse Vorteil, wenn me so "früeh" im Wasser isch: mir händ s ganzi Bad für uns ka, acht 50m Bahne für 10 Schwümmer/inne.
So isch d Usred, ich ha kei richtige Delfinzug wäge Platzmangel chönne mache, wäggfalle.
Nachem Training simmer no e Rundi ins Sprudelbad gange, me het so richtig s Gfühl vo Ferie becho.
Au hämmer no ufd Rutschbahn dörfe, mir händ natürlich alli Regle, wo ufere Rutschbahn so üblich sind, ighalte.
D Cynthia het sehnsüchtigscht nacheme Rösli verlang, aber do unseri "Buebe" nit würklichi Gentlemen sind, het sie vorerscht keins becho.
Denn nachem Mittagässe hämmer ändlich mol chli Pause ka, ändlich Zit für Gilmoregirls und anderi Färnsehsändige.
S’ Nomitagstraining isch au nit alzu sträng gsi, genauer gseit aktivi Erholig oder Kompensationstraining.
Wow, me cha glaub doch bi gwüsse männliche Teilnähmer vo Herre rede: d Cynthia het doch no ihres Rösli becho.
(Vellicht durch usenandernäh vomene Struss, wo ufem Tisch gstande isch?!)
Am Obe isch denn wiederum e Färnserundi agseit gsi und nachdäm mr usegfunde händ, dass dr Botta richtig singbegabt isch,
isch au dä Tag scho wieder verbi gsi.
Zischtig, dr 15.02.05
Hüt isches wieder erscht am 9i los gange mit trainiere. So hämmer no chli Zit ka zum verdaue zwüsche Morgeässe und Training.
Au hüt isch die morgentlichi Rutschpartie sowie d Sprudelbadrundi nit z churz cho.
Was uns natürlich bsunders gfreut het isch, wo mir bim Mittagässe vernoh händ, dass es am nögschte Tag Pizza nach Wahl gä wird.
So simmer mit wilde Diskussione, wär jetzt welli Pizza wählt, zrug ins Hotel gfahre um uns dört für s nögschte Training vorzbereite.
S Obetraining isch immer chli schnäller verbi gsi, als s Morgetraining, denn nach uns sind d Schaffhuser no go trainiere.
Für dr vorplanti Filmobe sind e paar Film zur Uswahl gstande, jedoch het eine s Renne für sich entschiede: Super süss und sexy.
Mittwuch, dr 16.02.05
"Hesch guet gschlofe?"
"Jo und du?"
"Nei ich bi sit am 4i wach, will ich mega Buchweh ka ha."
Das sind die erschte 3 Sätz am Mittwuch Morge gsi und denn isch d Cynthia uf s WC gspeedet und... jo ich wills jetzt do nit witer beschriebe.
Am Zmorgetisch han ich denn erfahre, dass es am Zimmi ungefähr glich goht, wie dr Cynthia. Unser Team isch also vo 10 uf 8 Schwümmer/inne gschrumpft.
Usgrächnet hüt hän die beide müesse chrank wärde, wos doch am Mittag Pizza gä sött.
Zerscht sind aber no es Training, e Rutschpartie und e Sprudelbadrundi z absolviere gsi. S Training am Nomitag isch wieder unterem Motto:
aktivi Erholig gstande. Au am hütige Obe sind wieder e Hufe Film zur Uswahl vorgschlage worde, dasmol het eine vo Walt Disney gswunne: Bären Brüder.
(Bom, Bom, Bom, gäll Raoul;))
Donnschtig, dr 17.02.05
Hüt isch also scho dr letschti Lagertag abroche.
Gwüssi Zimmer händ müesse grumt wärde, und so sind denn halt die andere dämentsprächend überfüllt gsi.
S Morgetraining isch dasmol "lockerer" gsi als s Nomitagstraining. Döt hets nämlich nomol sone richtigi Stehvermögeserie gä.
Mir händs aber alli mehr oder weniger guet überstande.
Als Abschied im Hotel hämmer alli no e Tafele Schocki gschänkt becho, was natürlich alli sehr gfreut het.
Uf em Heiwäg isch denn no zur Debatte gstande, ob mir nit no paar Trainingstäg im Tessin sölle ahängge,
sie isch denn jedoch abglehnt worde und zwar nit vo de Schwümmer/inne sondern vom Trainer.
So simmer also alli total entkräftet ins Hotel Mama zrugcho und händ uns uf s Usschlofe am nögschte Morge dörfe freue.
Svenia Schnyder
|
|
